新作「速」測試報告 – 測試平台為PC Steam
可以同隊友協力嘅魂系新作《Lords of the Fallen》尋日正式推出！
本住期待魂系遊戲嘅心態當然我地又即刻測試下。
今次預先講明，佢係喺我地報告首次出現不推薦嘅遊戲！！
至少如果佢無更新改動，
我諗大家都可以唔洗玩住。
魂系遊戲有難度係正常嘅，
但如此將不同內容加上失敗嘅規劃，
就係不推薦嘅原因。
遊戲有個獨特嘅系統，
本來感覺都幾創新，
玩家可以用提燈，
進入類似裡世界概念嘅「影界」。
「影界」係遊戲嘅關鍵，
有好多解迷同隱藏要素都喺「影界」，
本身適當利用呢個設計遊戲樂趣一定大增，
更可以提升遊戲原創性，
但係偏偏製作組就係設計到令人絕望大增。
本身喺世界中，
怪物同敵人數量比起一般魂系遊戲已經異常地多，
你以為打完眼前所有怪，
就可以停低休息一下喺路邊睇下裝備？
你絕對會睇睇下嘅時候，
轉頭就會比唔知邊度再出現嘅敵人又打你兩下。
通常魂系遊戲未到Boss前，
有啲小怪都總可以跑過唔理就算，
但係本作敵人見過你就會窮追不捨，
而且地圖設計普遍狹窄，
你未試過喺魂系遊戲「拉火車」的話，
本作就可以體驗到。
再講返「影界」，
成個問題嘅癥結就出現。
「影界」系統作為增加遊戲樂趣同耐玩性的話，
本來係一大優勢，
但首先，玩家進入「影界」後，
就係體驗到不停扣血！
灰血仲要打怪同用提燈「虹吸」先有得回，
仲要敵人本身就比較多，
喺「影界」留得越耐，
敵人就比表世界出現得更多。
仲有，如果留喺「影界」太耐仲會有死神出現，
而且入咗「影界」，
喺咁嘅極限狀態下，
再加一堆小怪前後夾擊，
要搵返離開嘅位置亦都唔容易。
究竟點解要一開始未深入瞭解遊戲嘅情況下，
就要玩家不停喺咁高壓嘅環境下Speed run式解謎同探索？
令到「影界」呢個遊戲設計優勢瞬間變缺點。
遊戲故事只有一開始華麗嘅Trailer略介紹世界觀，
以為一路玩落去會有文件資料或者NPC解說，
但首先就要喺教學先一次過記一堆專用名詞，
而且打到一王後都唔太指望玩家知道發生緊咩事。
一路打上去只係知到底發生了甚麼事？
開頭選職業甚麼光輝值、煉獄值完全無說明，
但道具等詳細說明又不停寫提升光輝值、煉獄值獲取更多內容。
動作方面近戰又極生硬，
基本上打後手就嬴，
不過打後手又會被怪前後夾擊，
後期仲會係一堆精英怪夾擊！
而且檔格、反擊都會扣血，
就會變成不停走但又不停被夾嘅情況。
加上遊戲存點位置好遠先有一個，
但又奇怪地加入可以當臨時存點嘅「遺骸之種」，
要得到呢粒種子又唔容易，
打王會跌或者後面好貴買一粒，
不過最激氣係有啲臨時位又同存點原來好近。
究竟呢啲設計，
係想玩家估位置？打怪清怪？逃走？探索？解迷？
感覺製作組係將難為玩家嘅想法大集合，
但又拎唔到一個核心想法出嚟而無好好規劃平均性。
可以兩人連機遊玩都係本作賣點之一，
但係只有場主先執到場中道具，
所有開路開存點位亦都一定係場主先㩒得，
定點裝備參加者同樣係唔會執到，
但掉落裝有時又會同時兩人都執到，
不過呢啲執唔到嘅野，
場主掉下參加者又會執到。
而且連機又會有唔同Bug出現，
隊友死咗復活唔到之餘，
怪又會不停瞄準隊友死咗嘅位置出招，
完全唔理另一個玩家，
Boss死咗招式仲會喺場上持續，
呢類Bug根本就令人享受唔到戰鬥過程。
雖然我地無遇過過程中太lag嘅情況出現，
不過甩FPS就絕對有，
而且Steam同PS5都大量玩家回報甩FPS同運行極度lag機嘅體驗。
令到畫風、風景、怪物呢類美術設計算係本作優點之一，
玩家都完全無暇欣賞。
魂系遊戲玩家嘅你可能都有深思過一個問題，
就係自己會唔會係一個抖M？
會玩魂系越被虐越爽？
如果你話本作嘅惡意係參考《Dark Souls》系列的話…
《Lords of the Fallen》成就咗魂系遊戲嘅最佳錯誤示範作品！
宮崎英高嘅《Dark Souls》系列，
同往後魂系作品嘅惡意之所以成功，
並唔係真係單純令人過唔到關嘅惡意。
成功嘅魂系遊戲往往主要元素都離唔開：
敵人同惡意嘅設計及配置、
神秘設定待玩家發掘嘅故事
有難度但唔係無法突破嘅難關、
適當嘅風格同遊戲過程規劃設計、
玩家同角色一齊成長過關嘅過程、
自由決定風格嘅地圖探索、
操作實用又唔會華而不實嘅戰鬥動作。
上述內容《Lords of the Fallen》都通往一個錯誤嘅發展，
眾多不良的遊戲進程規劃，
令遊戲成為咗一隻純粹嘅惡意怨念集合體。
雖然唔知道制作組有過咩經歷，
但當惡意集合過頭，
只會變成單純令人不滿嘅怨靈。
再配合另一隻魂系作品《Lies of P》喺上月先推出，
難免會令玩家比較，
已經唔需要拎魂系頂點《Dark Souls》《Elden Ring》《隻狼》呢類比較，
新晉魂系團隊嘅《Lies of P》設計都已經多方面都比本作優秀，
而且價格定位更便宜，
亦令到《Lords of the Fallen》更加比下去。
整體遊戲評分：
遊戲性：⭐️
故事性：⭐️
困難度：⭐️⭐️⭐️⭐️⭐️
完整性：⭐️
耐玩性：⭐️
推薦度：不推薦
（每項評分最高為五顆⭐️）
#LordsoftheFallen
#魂系遊戲
#PS5
#Steam
分享此文：
按一下即可分享至 X(在新視窗中開啟)
X
按一下以分享至 Facebook(在新視窗中開啟)
按一下以分享到 Telegram(在新視窗中開啟)
Telegram
分享到 WhatsApp(在新視窗中開啟)
喜歡 正在載入…